Хабарингиз бор, ёрқин ўйинлари билан “Ювентус” сафида ажралиб турган Карлос Тевес ва Андреа Пирло мавсум сўнггида “кекса синьора” сафини тарк этишди. Клуб ярим ҳимоячиларидан яна бири Артуро Видаль ҳам тез орада “Бавария”га қўшилиши кутилмоқда.
Шу муносабат билан “Ювентус” раҳбарияти юзага келган бўшлиқларни тўлдириш мақсадида трансфер бозорида анча активлашди. Gazzetta dello Sport наширининг хабар қилишича “туринликлар” “Реал Мадрид” аъзоси Искога катта қизиқиш билдирмоқда. 23 ёшли футболчи ёрқин ўйини билан кўпчилик эътиборини қозонган ва шу сабабли унинг трансфер нархи юқори бўлиши ҳеч гап эмас.
Таъкидлаш керакки, трансфер ойнаси давомида “Ювентус” “мадридликлар”дан Сами Хедирани сотиб олишганди.
