"ПСЖ" ва Швеция терма жамоаси ҳужумчиси Златан Иброҳимович "Манчестер Юнайтед"га ўтиши ҳақидаги гап-сўзларга муносабат билдирди.
"Бу ҳозирча шунчаки миш-мишдан бошқа нарса эмас. Келажагимга яқин ҳафта ичида аниқлик киритилади ва бундан ҳамма ўз вақтида хабар топади. Шундай экан, журналистлардан шошма-шошарлик билан сенсация қиламан деб “пашшадан фил ясаш”ни маслаҳат бермайман.
Мени кўплаб жамоалар билан боғлашаётганидан хабардорман. Аммо мен улардан фақат биттасидагина тўп суришим мумкин.
Луи ван Гал, шак-шубҳасиз, ажойиб мутахассис! Лекин у билан бирга ишлаш осон эмас. Ўртамиздаги муносабатлар ҳам идеалдан анча йироқ.
Умуман олганда иккаламиз ҳам профессионаллармиз ва ягона мақсад атрофида бирлашишимиз мумкин. Баҳслашиш эса менга доим завқ бағишлаган”, - дея euro-football.ru Иброҳимовичнинг L'Equipe нашрига берган интервьюсини келтиради.
