Дастлаб сафга Самуэль Это~О қўшилди. Орадан беш йил ўтиб Лионель Месси харид қилинади. Диққат қилинг, бугунги муҳокама мавзуси - юксак чўққиларни кўзлаётган Туркиянинг «Антальяспор» клуби трансфер сиёсати .
Туркия жамоалари йирик трансферларни амалга ошириш орқали ўз ишқибозларини хурсанд қилишда давом этишмоқда. Айниқса, бу борада Истанбулнинг «Галатасарой»и етакчи. Ушбу клуб таркибидан доимо 2-3 нафар машҳурлар номи ўрин олади. Амалдаги чемпион азалий рақиблардан фарқли ўлароқ, жорий йилнинг ёз ойидаги трансферлар бозорида унчалик фаол эмас. Луиш Нани ва Робин ван Персини харид қилган «Фенербахче» таркибида эса яна янгиликлар содир бўлиши эҳтимоли юқори.
Аммо бугунги суҳбат мавзуси грандларга тааллуқли эмас. Гап Туркия суперлигасининг 13-жамоаси - «Антальяспор» ҳақида кетмоқда. Сайёҳлар орасида ном қозонган шаҳар шарафини ҳимоя қилувчи клуб ҳам янгиликлар борасида бошқалардан қолишмаяпти. Жумладан, барчага маълум жаҳонгашта Самуэль Это`О Ўрта ер денгизи соҳилидан қўним топди. Шунингдек, камерунлик ҳужумчига жамоадош бўлиши кутилаётганлар орасида дарвозабон Виктор Вальдес ҳамда бразилиялик ҳимоячи Алекс ҳам бор. Ҳотамтой турклар Римнинг афсонавий «императори» Франческо Тоттига таклиф билан чиқишганига нима дейсиз?
Афтидан, бу галги мавсумлар оралиғи мазкур клуб тарихида ўчмас из қолдиради. 1966 йили ташкил этилган «Антальяспор» ҳозиргача қайд этган натижалари билан мақтана олмайди. «Чаёнлар» 1982 йили илк марта суперлигада қатнашиш имконини қўлга киритишди. Орадан уч йил ўтиб, қуйи дивизионга «сургун қилинган» клуб бир йилдан сўнг яна элитага қайтди. Кейинги йиллар худди лифтдагидек гоҳ юқорига, гоҳ пастга ҳаракатланиш билан ўтди. 2000 йили «Антальяспор» ҳаттоки Туркия кубоги финалигача бориб, ҳал қилувчи баҳсда «Галатасарой»га ютқазди.
Демак, олдига улкан мақсадларни қўйишга кўникмаган, суперлигада мунтазам ўринга эга бўлмаган жамоа тўсатдан қизиқарли трансферларни амалга ошириш орқали жамоатчилик эътиборини ўзига қаратди. Бу албатта, ажабланарли, лекин тушуниш мумкин. Хўш, сизнингча, Это~Онинг Антальяга ўтишига сабаб нима? Умуман, ёши ўтган футболчилар нега айнан Туркияни танлашмоқда? Тўғри, шартномада белгиланган маблағдаги «нол»ларнинг кўплиги туфайли. Пул масаласида турклар сахий. Хусусан, камерунлик ҳужумчининг маоши 4 млн. еврони ташкил этади. Мабодо Тотти ушбу клубдан қўним топса, африкалик ҳамкасбидан икки баробар кўп топади. Ҳақли савол туғилади: шунча пул қаердан келяпти?
IATI сайёҳлик компанияси - «Антальяспор»нинг асосий ҳомийларидан бири саналади. Это`Онинг тақдимот маросимида мазкур ташкилот бош директори Левент Айдин ҳам қатнашди. Tez Tour асосчиларидан бири 2012 йили иш жойини IATIга алмашди. Клубнинг трансфер бозоридаги фаоллиги шу инсон билан узвий боғлиқ.
«Антальяспор» - йирик харидлар майдонида янги ном. Ўз-ўзидан ушбу клуб олдига қўйган мақсадлар кўпчиликни ҳайратга солиши табиий. Орадан беш йил ўтиб, Ўрта ер денгизи қирғоқларига Лионель Мессининг жалб этилиши ҳақидаги гап-сўзларни ўқиш футбол ихлосмандларини қизиқтириши аниқ. Дарвоқе, яқин ўтмиш юлдузларидан яна бири - Роналдиньонинг «Антальяспор»га ўтишига бир баҳя қолди. Афсуски, бразилиялик футболчини бошқалар «илиб» кетишди. Ҳозирча клуб мутасаддиларининг кимлар билан музокара олиб бораётганини фақат тахмин қилиш мумкин. Аммо камтарона клубнинг йирик харажатлари ҳали узоқ вақт ишқибозлар диққат марказида бўлса, ажабмас. Айниқса, бу ҳолат Россия клубларидан бирини эслатяпти.
ЎРИНЛИ ЎХШАТИШ
Россияда йўлга қўйилган «Анжи» деб номланувчи лойиҳа ишбилармон Сулаймон Керимовнинг молиявий қўллаб-қуватлаши натижасида дастлаб муваффақият қозона бошлади. Роберто Карлос, Это`О, Юрий Жирков, Виллиан... Маҳачқалъаликлар таркиби вақт ўтгани сайин кучайиб борди. Кейин эса кутилмаганда инқирозли ўзгаришлар кузатилди. Йўналишнинг кескин ўзгариши оқибатида клуб Россия премьер-лигасини тарк этди.
«Антальяспор»да содир бўлаётган ўзгаришлар эса кўп жиҳатдан «Анжи»ни эслатяпти.
Муваффақият. Ҳар икки жамоа бадавлат инвесторлар келишидан аввал унча танилмаган. Ҳар иккисининг энг яхши натижаси мамлакат кубоги финали бўлган.
Лигадаги ўрин. Маҳачқалъаликлар тарихий ўзгаришлар арафасида премьер-лиганинг сўнгги мавсумини 11-поғонада якунлаган бўлишса, «чаёнлар» суперлиганинг 13-ўрни билан кифояланишди. Тафовут унчалик катта эмас.
Хўжайин. Левент Айдин қайсидир маънода Керимовни эслатади. Ҳар иккиси янги лойиҳага пулни аямаяпти, ҳар иккиси Самуэль Это~Они харид қилди.
КЛУБЛАР НОМИ «А»ГА БОШЛАНАДИ. БУ ТАҚДИРМИ?
Башорат қилиш яхши эмас. Айниқса, «Антальяспор» билан боғлиқ вазиятда. Жамоанинг шаклланиш жараёни энди бошланди, ҳали кўплаб номдор футболчилар Ўрта ер денгизига ташриф буюриб, ўз ўйинлари билан маҳаллий ишқибозларни хурсанд қилишади. Бир нарса аниқ: жамоага нисбатан қизиқиш кескин ортган. Мисол учун, камерунлик форвардни таништириш маросимига кўп сонли томошабинлар тўпланишди. 33 минг кишига мўлжалланган янги стадион қурилиши якунланиш арафасида. Бу ҳам жамоатчилик диққатини ўзига қаратиши тайин.
«Антальяспор»ни келажакда нималар кутаётганини фақат вақт кўрсатади. Балки «Анжи»нинг тақдири Туркияда такрорланар: болалигидан Антальяда яшашни хоҳлаган юлдузлар янги манзиллар томон тарқаб кетишар. Ёки «Манчестер Сити»дан ўрнак олиб, дастлабки чемпионлик ва ёрқин келажак сари олға қадам ташлайди.
«Олдинда бизни қизиқ воқеалар кутиб турибди, - деди Самуэль Это`О тақдимот маросими чоғида. Бу борада камерунлик футболчининг фикрига қўшилиш мумкин, ҳар қандай вазиятда ҳам зерикишга ҳожат қолмайди.
