Дам олиш кунларида Россия ва Украина майдонларида мамлакат чемпионати доирасидаги навбатдаги тур ўйинлари бўлиб ўтди.

Россия чемпионати 3-тур ўйинлари бўлиб ўтди. Ушбу тур ўйинлари доирасида Ўзбекистон миллий терма жамоаси ҳимоячиси Виталий Денисов тўп сурадиган Москванинг “Локомотив” футбол клуби ўз майдонида “Динамо”ни қабул қилди. Пойтахт дербисида дуранг натижа қайд этилди. 40-дақиқада Г. Морозов меҳмонларниҳисобда олдинга олиб чиққан бўлса, 61-дақиқада Чорлука ҳисобни тенглаштирди. Денисов ўйинда тўлиқ ҳаракат қилди.

Ўзбекистон миллий терма жамоаси ярим ҳимоячиси Одил Аҳмедов фаолият олиб бораётган “Краснодар” эса “Ростов” майдонига сафар уюштириб, бир очко билан қайтди. Ушбу учрашувда ҳисоб очилмади. Аҳмедов эса учрашувни асосий таркибда бошлаб, 90 дақиқа давомида майдонда бўлди.

Украина чемпионатида ҳам учинчи тур ўйинари бўлиб ўтди. Ўзбекистон миллий терма жамоасининг яна бир ярим ҳимоячиси — Санжар Турсунов ўйнайдиган “Ворскла” жамоаси бу турда ўз майдонида "Днепр”ни қабул қилиб, 1:1 ҳисобида дуранг ўйнади. Турсунов ўйинни тўлиқ ўтказди. Айни вақтда “Ворскла” учинчи турдан кейин уч очко тўплаган ҳолда, турнир жадвалининг 9-ўринини эгаллаб турибди.