Фарғонанинг “Нефтчи” жамоаси давралар оралиғида таркибга жалб қилган янги ўйинчиларини кенг жамоатчиликка расман таништирди.

Ҳимоячи Адриан Кашкавал, ҳужумчи Отабек Исроилов ва дарвозабон Абдумавлон Абдужалиловлар иккинчи даврада “Нефтчи” шарафини ҳимоя қилади. Ўзбекистон ПФЛ кейинги мавсумда легионер дарвозабонлардан фойдаланиш имкониятларини чеклаб қўйди. Шу сабабли, Мурод Исмоилов “Пахтакор”дан Абдумавлон Абдужалиловни харид қилди. Бир вақтлар “Нефтчи”да ўйнаган Отабек Исроилов яна клубга қайтди. “Олмалиқ”дан эса молдовялик ҳимоячи харид қилинди. Бу ўйинчилар кейинги даврада ҳақиқатдан ҳам “Нефтчи”ни кучайтира оладими?

Мазкур сўровга иккинчи давра жавоб беради. Аслида, ҳужумчи Олий лигадаги энг катта муаммо ҳисобланади. Шу сабабли, бугунги кунда ўртамиёна ҳужумчилар ҳам камида учта жамоа ўртасида талаш бўлмоқда. Мурод Исмоилов ҳимояни кучайтириш учун Адриан Кашкавални харид қилди. Бироқ мазкур ҳимоя иштирок этган илк баҳсда “Нефтчи” ўз дарвозасидан тўрт марта гол чиқди. Савиясиз легионер дейишга шошмай турайлик. Майли, бу ҳолатни омадсизликка йўямиз ва Адрианни иккинчи даврада “Нефтчи” ҳимоя зонасида ўзини қанчалик даражада кўрсатишини кўзатамиз. Шу ўринда унга омад тилаймиз.

Жаҳонгир Меҳмонов, Шукурали Пўлатов, Дилёр Эрматов каби моҳир ҳимоячилар билан таркибдаги рақобда хорижлик ҳимоячи ғолиб чиқа оладими? Умуман, саволлар кўп.

“Рухсор” радиоси, “Футбол кундалиги” дастуридан.