Дам олиш кунларида Россия ва Украина чемпионатларида навбатдаги тур ўйинлари бўлиб ўтди.
Россия чемпионатида 4-тур ўйинлари доирасида Ўзбекистон терма жамоаси ҳимоячиси Виталий Денисов тўп сурадиган Москванинг “Локомотив” клуби сафарда “Урал”ни мағлуб этди. “Темирйўлчилар”нинг уч голига мезбонлар фақатгина бир бора жавоб қайтара олишди. Эътиборлиси, меҳмонларнинг учинчи голи киритилган вазиятда Майконга тўпни айнан Виталий Денисов етказиб берганди. Таъкидлаш керакки, Денисов учрашувда 90 дақиқа давомида майдонда ҳаракат қилди.
“Урал” устидан қозонилган ғалабадан сўнг “Локомотив” тўплаган очколари сони 10тага етди ва улар айни вақтда турнир жадвалида “Зенит” ва ЦСКАдан кейин учинчи ўринни эгаллаб турибди.
Украина чемпионатида ҳам 4-тур ўйинлари бўлиб ўтди. Ҳамюртимиз Санжар Турсунов фаолият юритадиган “Ворскла” жамоаси бу турда ўз майдонида “Шахтёр”ни қабул қилиб, 2:2 ҳисобтида дуранг ўйнади. Турсунов майдонга асосий таркибда тушиб, ўйинни тўлиқ ўтказди.
