“Машъал”, “Насаф”, “Самарқанд-Д”, “Навбаҳор” ва “Локоматив-БФК” жамоалари таркибида тўп сурган, юртимизнинг кўзга кўрган иқтидорли ҳужумчиси Жасур Бобоев катта футболга қайтди.

“Навбаҳор” клуби таркибида оёғидан жиддий жароҳат олган Ж.Бобоев анча вақт майдонда кўринмай қолди.

Футболчи учун жароҳат олишдек оғир фожеа бўлмаса керак. Метин ирода соҳиби – Жасур Бобев ушбу жароҳатдан кейин узоқ вақт муолажаларга гирифтор бўлди. Аввалига Тошкент шаҳрида ўтказилган жарроҳлик амалиёти фойда бермади. Сўнг эса Ҳиндистонда яна жарроҳлик амалиёти ўтказишга мажбур бўлди.

Жорий йилнинг бошидан футболчи якка тартибда тикланиш машғулотларига киришди. Ўйин амалиётига эга бўлиш, спорт формасида бўлиш учун биринчи даврада, биринчи лига вакили Тошкентнинг “Локоматив-БФК” жамоаси сафида ўйнади.

Мана энди Жасур Бобоев катта футболга қайтиб, ўзи учун қадрдон ҳисобланган муборакнинг “Машъал” жамоаси сафига қўшилди.

Айни пайтда у “Машъал” ўринбосарлари таркибида ўйнамоқда. Жасур Бобоев ёшлар лигасининг 18 -тур доирасидаги “Машъал”-“Металлург” баҳсида ўз ҳисобига гол ҳам ёзиб қўйди.

Умид қиламизки, меҳнатсевар, кучли ирода ва сабрга эга футболчи яна аввалги мавқиега эришади. Жасурнинг футболчи сифатида бошидан ўтган кечинмалари ортда қолган бўлсин, деб қоламиз.

Фахриддин ЧОРИЕВ