Малайзияда нуфуз жиҳатдан иккинчи ўринда дея эътироф этиладиган премьер лига баҳсларининг 2015-йилги мавсуми ўз якунига етди.
Кеча сўнгги – 22-тур учрашувлари ўтказилди. Ҳамюртларимиз Фарҳод Тожиев ва Садриддин Абдуллаев тўп сурадиган “Т-Тим” клуби сўнгги турда “Куантан” жамоаси меҳмони бўлди. Анчагина шиддатли руҳда ўтган учрашувда “Титанлар” жамаоси 2:1 ҳисобида имкониятни бой бериб қўйишди ва Супер Лигага йўл олиш ҳуқуқидан маҳрум бўлишди.
Чунки мусобақа жадвалига эътибор қаратадиган бўлсак, “Т-Тим” 22-турдан сўнг 42 очко билан жадвалнинг 3-поғонасидан ўрин олди. 2-ўринда турган “Пенанг” ҳисобида эса 45 очко мавжуд. Премьер Лига чемпионига айланган “Кедаҳ” эса 48 очко жамғаришга муваффақ бўлди.
Шу тариқа бир неча очко етмагани туфайли “Т-Тим” элита йўлланмасидан қуруқ қолди. Шу ўринда таъкидлаб ўтишимиз жоизки, бунда қайсидир маънода Фарҳод Тожиевнинг ҳам “айби” бор. Зеро биринчи даврада ва иккинчи давранинг илк турларида деярли ҳар бир учрашувда камида 1 тадан гол киритаётган Фарҳод жароҳат олгач, “Т-Тим”нинг ишлари юришмай қолди.
Ҳозирда Тожиев жароҳатини даволаш билан банд. Садриддин Абдуллаев эса қўлидан келганча жамоасига ёрдам беришга интилди. Лекин омад бу гал “Титанлар”дан юз ўгирди ва жамоа Премьер Лигада қолиб кетди…
