Кеча Испания чемпионати 3-тури доирасида “Эспаньол”га қарши учрашувда “Реал” ҳужумчиси Криштиану Роналду 5 та гол киритгани ва “Қироллик клуби”нинг Ла Лига тарихидаги энг яхши тўпурарига айланганидан бохабарсиз. Россиянинг “СЭ” нашри португалиялик юлдузнинг антиқа рекордларини жамлаб қизиқарли мақола тайёрлаган у билан сизларни ҳам таништирмоқчимиз.
Португалия терма жамоаси тарихидаги энг яхши тўпурар
Педро Паулетанинг рекордини (47 та гол) “Реал” ҳужумчиси ЖЧ-2014 саралаш босқичи доирасида Швецияга қарши плей-офф ўйинлари вақтидаги хет-триклари билан такрорлашга муваффақ бўлганди. Кейинроқ Роналду голлари сонини 55 тага етказиб рекордни янгилади ва ушбу рўйхатда яққол етакчига айланди.
Европа чемпионатлари саралашлари ва финал босқичларининг энг яхши тўпурари
Бир йил аввал Арманистон терма жамоаси билан учрашувда Роналду УЕФА халқаро мусобақалари доирасида 23-голини киритди. Шу тариқа, португалиялик футболчи даниялик Йон Даль Томассон ва туркиялик Хоқон Шукурдан ўзиб кетди. Айни вақтда “Реал” ҳужумчиси ҳисобида 26 та гол мавжуд (6 таси финал турнирларида ҳамда 20 та гол – саралаш босқичларида киритилган).
Ўйинларнинг ҳар бир дақиқасида гол киритган
Европа футбол статистикаси шуғулланувчи мутахассисларнинг текширувлари натижасига кўра Роналду мажозий маънода ҳудди лототрон каби барча 90 шарчани айлантириб чиққан. Тақдир туҳфасини қарангки, сўнгги шарча 7-дақиқа яъни Криштианунинг ўз рақами. Ўтган йилнинг февраль ойида “Атлетико”га қарши учрашув унга ушбу антиқа натижани тақдим қилган. Яъни Роналду бунга қадар 1- дан 90-дақиқагача бўлган вақт давомида гол киритган, аммо ҳали 7-дақиқада гол кирита олмай келаётганди. Мадрид дербисида у бу ишнинг ҳам уддасидан чиқди ва антиқ рекорд муаллифи бўлди.
Иккита клуб билан барча совринларга эга чиққан
Португалиялик қахрамонимизнинг рақобатчиси Месси ҳали янгилай олмаётган натижалардан бири: бу ўзи ҳаракат қилаётган чемпионатда, мамлакат кубоги, Чемпионлар Лигаси, Клублар ўртасидаги Жаҳон чемпионатида ғолиб чиқиш. Шунингдек, Роналду “Олтин тўп” ҳамда “Олтин бутса” мукофотларини “Манчестер Юнайтед”даги даврида ҳам “Реал”да тўп сурган пайтида ҳам қўлга киритишга эришган футболчи.
Бир мавсум давомида ЕЧЛда киритилган голлар сони бўйича рекордчи
2013/14-йилги мавсумда Роналду ЕЧЛдаги барча ўйинларда жами 17 та гол киритди ва Месси ҳамда Жозе “Маццола” Алтафини рекордларини янгилади.
Европа Чемпионлар Лигаси тарихидаги энг яхши тўпурар
Ушбу натижа юзасидан кураш тахминан уч тўрт йил муросасиз кечиши аниқ. Месси ҳамда Роналду ҳисобларида Чемпионлар Лигасида 77 тадан гол бор, бу йилги мавсумда уларнинг қай бири рўйхатда биринчи бўлишини эса олдиндан тахмин қилиш мушкул.
“Олтин бутса”ни тўрт марта қўлга киритган футболчи
2008-, 2011-, 2014- ва 2015-йилларда Роналдуга голлар сони бўйича Европа чемпионатларида тенг кела оладиган футболчи топилмаган. Тўртта “Олтин бутса” ҳали ҳеч бир футболчида йўқ, ҳатто Мессида ҳам улар сони учта.
Испания чемпионати тарихидаги хет-триклар сони бўйича рекордчи
Роналду 28 учрашувда Испания Ла Лигасидаги “Реал” рақиблари дарвозасига хет-трик йўллаган. Ҳали ҳеч ким Роналдудан олдин бу каби натижани қайд этмаганди. Ўз фаолияти давомидаги энг муҳим хет-триклардан бирини Криштиану 2012-йил апрелида “Атлетико”га қарши “Мадрид дербиси”да киритган.
“Реал”нинг Испания чемпионатлари тарихидаги энг яхши тўпурари
Юқорида айтиб ўтганимиздек бу рекорд ҳали янги: “Эспаньол” дарвозасига йўлланган пента-трик яъни бешта гол буюк тўпурарлар Рауль Гонсалес ҳамда Альфредо Ди Стефанонинг ортда қолдирилишини таъминлади. Энди Роналду ҳисобида Примерада жами 231 та гол мавжуд.
“Реал” тарихидаги деярли энг яхши тўпурар
Шанба куни қўйган рекорди сабаб Роналду “Реал” тарихидаги энг яхши голеадорга яқинлашиб олди. Энди Криштиануда барча мусобақаларда жами 318 та тўп мавжуд, мадридликлар собиқ афсонаси Раулда эса улар сони – 323 тани ташкил қилади, аммо орадаги тафовут 5 та голни ташкил қилишини ва Криштианунинг сўнгги мавсумлардаги сермаҳсул ўйинини инобатга олсак тез орада “Қироллик клуби” тарихидаги энг яхши тўпурар ким бўлиши мумкинлигини тахмин қилишимиз мумкин.
Акбар Сиддиқов таржимаси
