Ўзбекистон кубоги ярим финали доирасидаги “Локомотив” – “Насаф” учрашувидан кейинги матбуот анжуманида меҳмонлар устози Рўзиқул Бердиев қатнашди.
-Аввало барча мухлисларимизни финалга чиққанимиз билан табриклайман, улар бунга ҳақли эдилар. Ўтган ўйиндаги 2:0 ҳисобидаги ғалаба ва бугунги баҳсда тартибли ҳаракатларимиз туфайли финалга чиқдик деб ўйлайман, - дейди Рўзиқул Бердиев. - "Локомотив"нинг охирги ўйинларини кўриб чиққандик. Кўпроқ ҳимояда ўйнадик, сабр қилдик, қарши ҳужумда имкониятни кутдик. Бизда ярим финалга чиққан тўртта жамоанинг савияси тенг деб ўйлайман. Финалда ким рақиб бўлишининг фарқи йўқ. Ниҳоят бу сафар финалда кубокни қўлга киритишга уринамиз. Йигитларимиз соврин ютишга ҳақли.
Ҳамза Каримов жароҳати туфайли майдонга тушмаяпти. Тўрт кундан сўнг яна шу жамоага қарши шу ерда ўйнаймиз. Таркибда катта ўзгаришлар бўлмайди, аммо тактика борасида ўзгаришлар бўлиши аниқ.
Олий лига доирасидаги баҳсда "Локомотив" билан дуранг ўйнасак хурсанд бўламан. Ўша ўйинда дуранг бўлса чемпионлик учун "Локомотив"нинг ҳам, "Насаф"нинг ҳам имкониятлари пасайиб кетади. Биз доим охиригача курашамиз.
