Мамлакат чемпионатининг иккинчи даврасини кутилганидан бўш бошлаган Бекободнинг “Металлург” жамоаси ниҳоят 22-турга келганда орзиқиб кутилган ғалабани тантана қилди. Кончилар Самарқанднинг “Динамо” жамоасини қабул қилишди ва 4:2 ҳисобида муваффақиятга эришдилар.   Учрашувдан кейин биз ҳар иккала жамоа мураббийларининг ўйин ҳақидаги фикрлари билан қизиқдик. *          *          * Рустам Мирсодиқов, “Металлург” ФК бош мураббийи: Биз учун ғалаба сув ва ҳаводек зарур эди. Иккинчи даврани кутилмаган жароҳатлар, таркибдаги йўқотишлар ҳамда футболчиларнинг функционал ҳолати билан боғлиқ бўлган муаммолар боис муваффақиятсиз ўтказаётган жамоамиздан ишқибозлар фақатгина ғалаба кутишаётганди десам, янглишмайман.   Бу сафар ҳам таркибни тузишда қийинчиликка дуч келдик. “Бунёдкор” билан ўйинда ҳужумчимиз Шаҳзодбек Нурматов жароҳат олганлиги боис майдонга туша олмаган бўлса, Мирғиёс Сулаймонов сариқ карточкалар боис мавсумдаги иккинчи ўйинини ўтказиб юборди. Яна бир ҳужумчимиз Сардор Расулов эса бетоб эди. Хуллас, ҳужум чизиғига ёшлар терма жамоамиз назоратида келаётган Шоҳназар Норбековни туширдик ва у умидимизни оқлади.   Тажрибали ярим ҳимоячи Руслан Вагапов ўзини кўрсатди. Футболчиларнинг руҳияти билан боғлиқ муаммолар ортда қолди деб умид қиламан. Бугун футболчилардаги иштиёқ эвазига 3 очколик бўлдик. Кейинги ўйинларгача асосий футболчиларимиз майдонга қайтишса, мухлисларимизни албатта хурсанд қилишда давом этаверамиз.