Германиянинг Берлин шаҳрида 42 км масофага ўтказилган марафонда қатнашган ўзбекистонлик спортчи Марина Хмелевская 2 соату 38 дақиқа 39 сонияда марра чизиғига етиб келди.

42-бор ўтказилган мазкур марафонда 131 давлатдан 41.000 нафардан зиёд спортчи иштирок этди. Марина Хмелевская белгиланган меъёрдан (2:42:00) қарийиб 4 дақиқа аввал маррага етиб келди. Шу тариқа у 2016 йили Рио-де-Жанейро шаҳрида ўтказиладиган XXXI ёзги Олимпиада ўйинларига йўлланма олди. Бу ҳақда Миллий олимпия қўмитасининг ахборот хизмати хабар қилди.

Ушбу мусобақада кениялик Гладис Черено 2:19,25 натижа билан биринчи, Аберу Кебеде (Эфиопия) 2:20,48 кўрсаткич билан иккинчи, Месерет Хайлу (Эфиопия) 2:24,33 натижа билан учинчи ўринни банд этган.

Эркаклар ўртасида ўтказилган марафонда эса кениялик Элиуд Кипчоге ва Элиуд Киптануи мос равишда биринчи ҳамда иккинчи ўринларни эгаллашган. Кучли учликни Фейиса Лилеса (Эфиопия) якунлаб берган.

Мазкур мусобақада иштирок этган яна бир ўзбекистонлик спортчи Андрей Петров 2:23,24 натижа билан 61-ўринда қолган.