Тошкентнинг “Бунёдкор” жамоаси терма жамоамиз иштирокидаги ўйин туфайли юзага келган танаффус пайтида “Бухоро” жамоаси билан назорат учрашувида куч синашди.

“Бунёдкор” футбол мактаби майдонида ўтган баҳсда кучлар тенг келди – 1:1. Ҳар иккала гол ҳам учрашувнинг биринчи бўлимида киритилди. Даставвал, Анвар Ғофуров томонидан оширилган тўпни Рустамжон Ашурматов боши билан бухороликлар дарвозасига аниқ йўллаб, ҳисобни очишга эришди. Лекин орадан кўп ўтмай Суҳроб Неъматов пенальтидан ўртадаги мувозанатни тиклади – 1:1. Учрашувнинг қолган дақиқаларида жамоалар таркибларида бир қанча футболчилар майдонга тушишган бўлса-да, ҳеч кимга ҳисобни бошқа ўзгартириш насиб этмади.

Эслатиб ўтамиз, “Бунёдкор” 25-тур учрашувини 12 октябрь куни Самарқандда “Динамо” клубига қарши ўтказади.