Қатар пойтахти Доҳа шаҳрида бокс бўйича ўтказилаётган жаҳон чемпионатида Ўзбекистон терма жамоаси аъзолари зафарли одимлашда давом этишмоқда.    Ҳозиргина тажрибали боксчимиз Муроджон Аҳмадалиев 56 кг. вазн тоифасида биринчи рақам остида сараланган қозоғистонлик Қайрат Ералиевни 3:0 ҳисобида мағлуб этиб, мухлису-мутахассислар олқишига сазовор бўлди.    Шу тариқа, Муроджон жаҳон чемпионатидаги ўзининг иккинчи жангида ҳам ишончли ғалабани қўлга киритиб, совринли ўринлар учун одимлашда давом этмоқда.    Энди Муроджон Ахмадалиев 10 октябрь куни ўтказиладиган чорак финал баҳсида таиландлик Чатчай Бутдега қарши рингга кўтарилади. Ҳамюртимиз сентябрь ойида Таиландда бўлиб ўтган Осиё чемпионати финалида айнан шу боксчи билан жанг олиб борганди. Ҳакамлар ғолибликни мезбон боксчига беришган.   Эслатиб ўтамиз, ушбу вазн тоифасида 1-3 ўрин эгалари 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмасини ҳам қўлга киритади.    Яна бироздан сўнг яна бир ҳамюртимиз Рустам Тўлаганов (-91 кг) Янги Зеландия вакили билан чорак финал йўлланмаси учун рингга чиқади.