Биласиз, бугун Олий Лигада 28-тур учрашувлари старт олди.

Кун доирасидан ўрин олган қизиқарли матчлардан бири “Локомотив” ҳамда “Шўртан” клублари ўртасида кечди. Асосан “темирйўлчилар” устунлиги остида ўтган ўйинда 4:1 ҳисоби қайд этилди.

Ўйиндан кейин ташкил этилган матбуот анжуманида дастлаб ғузорликлар устози Мухтор Қурбонов иштирок этди.

- “Локомотив”ни ажойиб ғалаба билан табриклайман. Рақиб бугун чиндан биздан устун эканини кўрсата олди. Бизнинг эса ўйинимиз ўхшамади. Мавсум аввалида якунда ўнталикка киришни мақсад қилгандик. Аммо охирги учрашувларни унчалик кўнгилдагидек ўтказа олмаяпмиз. Бизга барқарорлик етишмаяпти. Бугун ҳам футболчилар гол ўтказиб юборгач ўйнашни тўхтатиб қўйишди, гўё.

Дарвозабонимизни алмаштирганимиз эса унинг жароҳат орттириб олгани билан боғлиқ. Маълум бўлишича, посбонимиз тиззасини жароҳатлаб олди. Натижада эса уни алмаштирдик.

Кўнгилдагидек ўйнай олмаётганимиз балки молиявий муаммоларга боғлиқ бўлиши ҳам мумкин. Чунки жамоамизда кичик молиявий муаммолар мавжуд. Айнан мана шу жиҳат ҳам футболчиларимиз руҳиятига таъсир этган кўринади, - дейди маҳоратли мураббий.