Биласиз, айни пайтда Ўзбекистон миллий терма жамоаси сардори Одил Аҳмедов Россиянинг “Краснодар” клуби шарафини ҳимоя қилмоқда.
“Буқалар” жамоаси расмий сайтининг ёзишича, тажрибали ярим ҳимоячи рус журналистларига интервью берди ва унда миллий терма жамоамизнинг янги устози тўғрисида ҳам фикрларини билдириб ўтди.
- Самвел Бабаян миллий терма жамоамизга соғлом ғалаба руҳини олиб кира олди. Аслида футболчи ва мураббий ўртасида руҳий алоқа ўрнатиб олиш жуда муҳим саналади. Самвел Вячеславович эса жамоани ўйинга қандай тайёрлашни жуда яхши билади. Натижада хатто захира ўриндиғида ўтирган футболчи ҳам ғалаба қозонишни чин дилдан истайди. Биз Бабаян билан унинг “Пахтакор”га вице-президентлик қилган давриданоқ танишмиз. Балки шуни инобатга олиб ҳам у айнан мени сардор этиб тайинлагандир. Яна шуни ҳам таъкидлай оламанки, янги мураббийимиз терма жамоага ёш футболчиларни ҳам жалб эта бошлади. 20 ёшли Жавоҳир Соҳибов ва 22 ёшли Игорь Сергеевлар шулар жумласидандир. Бу эса жамоа сардорига янада улкан масъулият юклайди, - дейди Аҳмедов.
