Мана, Самвел Бабаян бошқарувидаги миллий терма жамоамиз кетма-кет ғалабалар қайд этиб, барчамизни қувонтирмоқда.

Дейлик, Тошкентда КХДР термасига қарши кечган ўйин ҳар жиҳатдан маъқул тушди. Очиғи, йигитларимизнинг бу қадар жон куйдириб тўп суришларини анчадан буён кўрмаган эдик. Айниқса, Сервер Жепаровга қойил! У сира тиним билмади. Демакки, Самвел Вячеславович футболчилар руҳиятига таъсир ўтказа олган, уларда иштиёқни ошириш уддасидан чиққан. Аммо ҳозирги натижалардан ҳаволаниб кетиш сира-сира ярамайди. Зеро, ҳақиқий синовлар олдинда турибди. Муҳими - таркибдаги мувозанатни бузмаслик. Ҳа, айни кундаги асосий вазифа - кейинги босқичга чиқиш ва ЖЧ-2018 чиптасини қўлга киритиш. Шунинг баробарида келажакни ҳам унутмаслик лозим. Демоқчиманки, Александр Гейнрихнинг тажрибасига таяниш баробарида дейлик, Элдор Шомуродовга ўзини кўрсатиш учун имконият тақдим этиш мақсадга мувофиқ. Ахир ёшларни айнан шу босқичда «пишитиб» бормасак, эртага кеч бўлади.

Шахсий фикримча, Элдорга ўхшаган йигитларимиз айни ҳолатда ўйинни тортиб кета олишади. Ҳарқалай, уларга 25-30 дақиқа ишонч билдириш мумкин. Ҳа, мураббий таваккал қилишни хоҳламайди ёки бундан чўчийди. Чунки кейинги босқичга чиқиш ҳали кафолатланмаган. Лекин барибир, озгина таваккалчилик ҳам керак. Хуллас, терма жамоа захираси қанча кучайса, шунча яхши. Зеро, салоҳиятли захирачилар энг тиғиз паллада, кутилмаган йўқотишлар пайти жуда асқотишади. Умуман, жамоамизнинг ҳозирги стратегиясига эътироз йўқ. Лекин шу билан чекланиб қолмай, қўшимча режалар, яъни вариантларни тайёрлаб бориш ниҳоятда зарур. Бу борада Самвел акага омад тилайман. Шоядки, унинг изланишлари якунда ниҳоят, кутилган самарани берса...

Юнусхон Асқаров,

Косонсой шаҳри.