Сербиянинг "Црвена Звезда" футбол клуби Туркияда қишки йиғинларини ўтказишдан бош тортди. Жамоа раҳбарияти "Россияга ҳурмат юзасидан" шундай йўл тутган. Бу ҳақда РИА Новости нашри серблар жамоаси президенти Звездан Терзичга асосланиб, хабар тарқатган.
"Биз аниқ қарор қабул қилдикки, Туркияга бормаймиз. Бунинг сабаби Россия ва Туркия ўртасидаги муносабатларнинг совуқлашгани билан боғлиқ. "Црвена Звезда" Россияга ва жаноби президент Владимир Путинга нисбатан ҳурматсизлик қилмоқчи эмас", деган Терзич.
Бироз олдинроқ, Москванинг "Спартак" жамоаси Туркиядаги йиғинларини бекор қилганди.
Эслатиб ўтамиз, 24 ноябрь куни тонгда Туркия—Сурия чегарасида Суриядаги ҳарбий операцияда иштирок этаётган Россиянинг Су-24 самолёти уриб туширилди. Туркиянинг таъкидлашича, самолёт мамлакат ҳаво кенгликларини бузиб ўтган.
Россия Мудофаа вазирлигининг қайд этишича, Россия самолёти Туркия ҳудудига кирмаган.
Россия президенти бу ҳодисага муносабат билдириб, буни "орқадан зарба бериш" дея баҳолаган.
