Хабарингиз бор, Германия чемпмонати 16-турида "Бавария" ўз майдонида "Ингольштадт"ни қабул қилиб, 2:0 ҳисобида ғалаба қозонди. Goal нашрининг ёзишича, мазкур ғалаба Мюнхен супер клубига Бундеслиганинг навбатдаги рекордини ўрнатиш учун замин яратди.
Гап шундаки, Бундеслига биринчи давраси якунига 1 та тур қолганда, мусобақа жадвали карвонбошиси “Бавария” ҳамда иккинчи поғонадаги “Боруссия Д” жамоалари ўртасидаги очколар тафовути 8 тани ташкил этмоқда. Шу тариқа, “Бавария”нинг давралар оралиғидаги танаффусга лидер сифатида йўл олиши аниқ бўлиб улгурди.
Диққатга сазовор жиҳати шундаки, “Бавария” бу орқали кетма-кет 5-йилдирки биринчи даврани пешқадам сифатида якунламоқда. Шу пайтга қадар бошқа ҳеч бир немис жамоаси бундай натижа қайд этган эмас эди.
