Қишки таътилни ўтказаётган жамоамиз декабрь ойининг иккинчи ярмида янги мавсумга тайёргарлик ишларини бошлаб юборади. Ўтган ҳафтада Наманганга келиб, Наманган вилояти ҳокими қабулида бўлган жамоамиз бош мураббийи Бахтиёр Ашурматов дастлабки режалар борасида суҳбатлашиб олди.
Ўзаро учрашувда кейинги мавсумда “Навбаҳор”ни камида кучли бешликдан жой олиш учун курашиши ҳам муҳокама қилинган. Ушбу ҳафтада Ашурматов яна бир бор вилоят ҳокими қабулида бўлади. Шундан кейин жамоанинг кейинги режалари борасида узил-кесил бир тўхтамга келинади.
Ҳафта бошида нашрдан чиқариладиган газеталар ижодкорларининг саволларига жамоа бош мураббийи Бахтиёр Ашурматов жавоб қайтарди. Бошқа нашр ижодкорлари каби “Аср футболи” мухбири ҳам Бахтиёр Аъзамович билан суҳбатда бўлди. Ашурматов “Аср футболи” газетасига берган интервьюсида, мавсум якунлари, вилоят ҳокими билан бўлган учрашув тафсилотлари билан ўртоқлашди. Ушбу суҳбатни ўқиш орқали мухлисларимиз ўзларини қизиқтирган саволларига жавоб олишлари мумкин. Тез орада ушбу суҳбатни сайтимиз орқали ўқиш имконига ҳам эга бўласиз.
