“Локомотив” кеча “Ал-Аҳли”га қарши ўртоқлик ўйинида майдонга тушгани ҳақида хабар бергандик. Навбатдаги учрашув 19 январь куни бўлиб ўтади.
Делегация Тошкентдан йўлга чиққанига роппа-роса бир ҳафта вақт тўлди. Бу давр мобайнида футболчилар яхши спорт формасига кириб олиш учун жон-жаҳдлари билан машғулотларда иштирок этишмоқда. “Ал-Аҳли”га қарши ўйин осон бўлмаганини бош мураббий Мирко Еличич ҳам таъкидлаб ўтди. Футболчилар олти кун давомида тинимиз меҳнат қилишди ва еттинчи куни йилдаги биринчи ўйинда иштирок этишди.
Катта эҳтимол билан бугунги машғулот бирозгина енгилроқ руҳда ўтади. Чунки жамоа аъзолари чарчоқ аломатларидан халос бўлишлари керак. Мазкур беллашув янги футболчилар ҳақида дастлабки тасаввурлар учун ғоятда муҳим эди. Айни пайтда таркибнинг деярли ярми “Локомотив” сафига янги келиб қўшилганлардан иборат. Черногориялик Иван Вукович ҳам иккинчи бўлимда майдонга чиқарилганини инобатга олсак, мураббийлар штаби у ҳақда у ҳақда дастлабки хулосаларга келган бўлса ажаб эмас.