Айни кунларда о лий лига жамоалари барча эътиборни янги мавсумга пухта ҳозирлик кўришга қаратишган. Навоийнинг “Қизилқум” жамоаси 23 январь куни иккинчи босқич ўқув-машғулот йиғинини якунлади. Машғулотлар Навоий шаҳрида уюштирилди.

Режага кўра, кончилар 24 январь эрталаб  Фарғонага етиб келишди. Ҳозирда навоийликлар Фарғонадаги “Азия hotel” меҳмонхонасида истиқомат қилишмоқда.

“Қизилқум”  футбол клуби мураббийлар штаби навбатдаги ўқув-машғулот йиғин доирасида 29  январь — 10 февраль кунлари бўладиган  анъанавий “Ҳоким кубоги” турнирида иштирок этишни режалаштиришган. Айни чоғда  ўттиз нафарга яқин футболчи мураббийлар кўригидан ўтмоқда.

Таркибда деярли ҳеч қандай йўқотиш йўқлиги эътиборлидир. Жамоани фақатгина ҳимоячи Асқаржон Муҳиддинов тарк этган. Навоийда ташкил  этилган иккинчи босқич тайёргарлик машғулотларига легионерлар украиналик Андрей Деркач, Вячеслав Шевченко, грузиялик Георгий Квесиешивили келиб қўшилишганди. Шунингдек, янги мавсумдан бошлаб Алишер Юсупов, Илҳом Юнусов (иккиси ҳам  “Насаф”дан), Самандар Шодмонов (“Шўртан”)лар  “Қизилқум” жамоаси шарафини ҳимоя қилишга яқин туришибди.

“Ҳоким кубоги” турнири баҳслари бошлангунига қадар, “Қизилқум” футболчилари бир неча назорат учрашувида майдонга тушишни режалаштирган. Жумладан, навоийликлар Фарғонада дастлабки ўртоқлик учрашувини 26 январда “Андижон” вакилларига қарши ўтказади. Бу ўйин Фарғонадаги “Марказий” стадионда соат 15.00 да бошланади.