“Насаф” ва “Пахтакор” учрашуви мамлакатимизнинг кўп сонли ишқибозларининг диққат эътиборида бўлиб турибди. Жумладан, Самарқандлик “Насаф” мухлиси Раҳимжон Худойқулов ўз фикрини шундай баён этди:

-Қўшни Қашқадарёлик дўстларимга ҳавасим келади, чунки уларнинг “Насаф”дек бутун оламга донғи кетган жамоалари бор. Гарчи Самарқанд вилоятининг Пастдарғом туманида яшасамда “Насаф”нинг ҳар бир ғалабаси қувончимга қувонч қўшади. Шодлигимни ичимга сиғдира олмасдан Қашқадарёлик дўстларим, ошна-оғайниларим, танишларимга қўнғироқ қилишга шошиламан ва ўйин тафсилотларини зўр иштиёқ билан сўзлайман. Қани эди бизда ҳам “Насаф”га ўхшаш жамоа бўлса деб, дилимда орзу-истак туяман.

Биз, самарқандликлар “Насаф”ни севамиз, унинг ғалабаларидан завқ шавқ оламиз Рўзиқул Бердиевдек тиниб-тинчимас, изланувчан, янгиликка интилувчан фидоий бош мураббийга офаринлар айтамиз. Яша “Насаф”, бўш келма, биз сен билан!

Шунингдек, фарғоналик таниқли адиб ва журналист, Ўзбекистонда хизмат кўрсатган маданият ходими Ҳамиджон Бурхонов, сурхондарёлик шифокор Илҳомжон Саттаров. Қорақалпоғонистонлик Давур Абдуллаевлар ҳам “Насаф” – “Пахтакор” учрашувини  сабрсизлик билан кутишаётганини изҳор этиб, мамлакатнинг икки гранд жамоаси ўйинидан завқ олишларини мамнуният билан билдиришди.

Хусан Темиров