Сербиянинг “Явор” клуби сафида ҳамюртимиз Ҳусниддин Ғофуров тўп суришидан хабарингиз бор.
Ҳужумкор ярим ҳимоячи Қатар яшил майдонларида ўтган 23 ёшгача бўлган футболчилар ўртасидаги Осиё чемпионатидан сўнг бироз муддат уйда ҳордиқ чиқаргач жамоаси сафига бориб қўшилганди. Сербия Суперлигасида жамоалар қисқа таътилга чиққани сабаб Иваница шаҳри жамоаси саналувчи “Явор” Македониянинг Охрид шаҳрида ўқув-машғулот йиғини ўтказди. Ҳамюртимиз ҳам мазкур йиғинда иштирок этди. Ҳусниддин Ғофуров “Металлург” ва “Борац” жамоаларига қарши ўтган учрашувларда майдонга ҳам тушди. “Борац”га қарши ўйинда ўзбекистонлик футболчи гол киритишга ҳам муваффақ бўлди.
Шунинг билан икки ҳафта давом этган йиғин якунланди ва “Явор Матис” Сербияга қайтди. Энди жамоа Сербия Суперлигаси 23-тур учрашувлари доирасида ўтадиган “Раднички” билан баҳсга ҳозирлик олиб бормоқда. “Раднички” – “Явор” учрашуви 21 феврал куни бўлиб ўтади.
