Хабарингиз бор, Испания чемпионати 27-турида "Барселона" Мадридда "Райо Вальекано"ни 5:1 ҳисобида мағлубиятга учратди.

Каталонияликлар мағлубиятсиз ўйинлари сонини 35 тага етказиб олди ва бу борада "Реал" томонидан қайд этилган рекордни янгилади. Қайд этиш керакки, "Барселона" 35 та ўйиндан 29 тасида ғалаба қозонган ва 6 тасида дуранг ўйнаб, 107 та гол урган ҳамда 20 та ўтказиб юборган.

Сўнгги бор Луис Энрике шогирдлари 2015 йилнинг октябрь ойида "Севилья"га 1:2 ҳисобида мағлуб бўлганди.

Эслатиб ўтамиз, аввалги рекорд "Реал"га тегишли бўлиб, мадридликлар 1988/89 йилги мавсумда 34 та ўйинда мағлуб бўлмаган.