Швейцариянинг Цюрих шаҳрида бўлиб ўтган ФИФАнинг навбатдан ташқари Конгрессида Ўзбекистон Футбол Федерацияси бош котиби Сардор Раҳматуллаев ҳамда Қозоғистон Футбол Федерацияси бош котиби Азамат Айтхожин ўртасида учрашув бўлиб ўтди.
Мазкур учрашув давомида иккала федерация бош котиблари икки томонлама ўзаро ҳамкорлик алоқаларини мустаҳкамлаш, шунингдек, мазкур ҳамкорлик доирасида бир қатор лойиҳаларни амалга ошириш борасида келишувга эришдилар.
Ушбу учрашувдан сўнг эса, ҳамкорлик доирасидаги лойиҳалардан бири сифатида ўзбекистонлик ФИФА рефериси Равшан Эрматов 8 март куни Астана шаҳрида бўлиб ўтдаган Қозоғистон Суперкубоги учун учрашувни бошқариб бориш учун таклиф олди.
Маълумот учун, Қозоғистон Суперкубоги учун учрашувда Қозоғистон пойтахти Астана шаҳридаги "Астана Арена"да "Астана" ҳамда "Қайрат" клублари ўзаро ўйнайдилар.
Шунингдек, мазкур лойиҳага кўра, ташриф давомида Равшан Эрматов Астана шаҳрида қозоғистонлик ёш реферилар учун семинар ўтказиши режалаштирилган.
Таъкидлаш жоиз, ўтган йил якунларига кўра "GlobeSoccer" талқинига кўра дунёнинг энг яхши ҳаками деб топилган Равшан Эрматов, бунгача уч маротаба Қозоғистон терма жамоасининг Қирғизистон, Уммон ҳамда Буркина-Фасо терма жамоаларига қарши ўтказган учрашувларда ҳакамлик қилган.
