Эртадан Олий Лигада 2-тур учрашувлари старт олади. Тур доирасидан ўрин олган қизиқарли тарзда ўтиши кутилаётган матчлардан бири Андижонда “Андижон” ҳамда “Локомотив” жамоалари ўртасида кечади. “Бургутлар” жамоаси ҳимоячиси Жавлон Гусейновнинг фикрича, мазкур матч ҳар икки жамоа учун ҳам осон ўтмайди.

"Дастлабки турда, афсуски, имкониятни бой бериб қўйдик. Энди 2-турда ҳам бизни осон ўйин кутмаяпти. Боиси “Локомотив” юртимиздаги гранд жамоалар қаторига киради. Лекин биз ҳам эртага майдонга фақат ғалабани кўзлаган ҳолда чиқамиз. Чунки илк турда мағлуб бўлдик. Бу сафар ишқибозларимизни хушнуд қилиш учун ҳам майдонда боримизни беришга интиламиз. Жамоамиз бу ўйинга яхши ҳозирлик кўрди. Йигитларнинг кайфияти ҳам яхши. Умид қиламанки, эртага бу мавсумдаги дастлабки ғалаба қўлга киритилади", - дейди маҳоратли футболчи SPORTS.uz интернет-порталига.

Таъкидлаб ўтамиз, “Андижон” клуби 1-турда “Пахтакор” меҳмони бўлди ва 2:1 ҳисобида мағлубиятга учради. Жавлон Гусейнов ўша учрашувда тўлиқ 90 дақиқа ўйнади ва 28-дақиқада ҳакам томонидан огоҳлантирилди.