Футбол бўйича ЖЧ—2018 ва Осиё Кубоги—2019 саралаши доирасидаги Филиппинга қарши ўйин арафасида Ўзбекистон миллий терма жамоасининг беш нафар футболчисида огоҳлантириш бор.
Аввалроқ, БААнинг «Аш-Шабаб» клубида тўп сурувчи ярим ҳимоячи Азизбек Ҳайдаров, аввалги ўйинларда икки сариқ карточка олгани сабаб, Филиппинга қарши ўйинни ўтказиб юбориши ҳақида хабар берилган эди. Саралашнинг аввалги учрашувларида Ўзбекистон термасининг бошқа етакчилари огоҳлантирилган.
Жумладан, Яман терма жамоасига қарши Тошкентда бўлиб ўтган ўйинда Одил Аҳмедов ва Жавоҳир Соҳибовга сариқ карточка кўрсатилган. Баҳрайнга қарши сафар учрашувида Егор Кримец ҳакам томонидан огоҳлантирилган бўлса, Ўзбекистон — КХДР ўйинида Сардор Рашидов ва Ислом Тўхтахўжаев сариқ карточкага «лойиқ кўрилган».
Номлари келтирилган футболчилар Филиппинга қарши ўйинда майдонга тушиб, япониялик рефери Рюжи Сато томонидан сариқ карточка билан огоҳлантирилса, 29 март куни бўладиган Баҳрайнга қарши жавоб ўйинини ўтказиб юборади. Шунда, агар Ўзбекистон миллий терма жамоаси саралашнинг кейинги босқичига йўл олса, етакчи футболчилар карточкалардан тозаланиб олади.
Маълумот учун, ЖЧ—2014 саралаши доирасида ҳам Ўзбекистон миллий терма жамоаси билан шунга ўхшаш ҳолат юз берган эди. 2011 йил 15 ноябрь куни Ўзбекистон терма жамоаси саралашнинг 3-босқичида Тожикистонни қабул қилганида, Александр Гейнрих, Одил Аҳмедов, Санжар Турсунов, Вагиз Галиулин, Ислом Тўхтахўжаев ва Шавкат Муллажонов огоҳлантирилганди.
Кейинроқ ФИФА вазиятни ўрганиб чиқиб, Александр Гейнрихдан бошқа барча футболчилар сариқ карточкани қасддан олган, деб топган ҳамда уларни қўшимча яна битта ўйинда дисквалификация қилган. Шундан сўнг бу бешлик ҳал қилувчи босқичда Эрон миллий терма жамоасига қарши дастлабки учрашувни ўтказиб юборган, Тошкентда бўлган шу ўйинд Ўзбекистон термаси 0:1 ҳисобида имкониятни бой берган.
