Жаҳон Чемпионати-2018 саралаш раунди иккинчи босқич ўйинлари доирасидаги Ўзбекистон – Баҳрайн терма жамоалари қарама-қаршилиги 1:0 ҳисобида якунига етди.
Ўйиндан сўнг футболчилар микст-ҳудудда интернет-порталимиз мухбирларига интервью беришди. Маҳоратли футболчи Даврон Ҳошимов мазкур ўйин борасида қуйидагиларни таъкидлади.
- Бугун жуда қийин ўйин бўлишини кутган эдик, Баҳрайн бизга майдоннинг ҳар бир қарич ерида муносиб қаршилик кўрсатди. Мақсадимиз ғалаба қозониб мухлисларни хурсанд қилиш эди, ўйлайманки мақсадимизга етдик.
Терма жамоамизнинг кейинги босқичга чиқиш масаласи ўйиндан аввал аниқ бўлиб улгурган эди, буни билгач майдонга қандай кайфиятда тушдинглар?
Тўғрисини айтсам, бу ҳақда ҳозир билдик. Ўйиндан икки кун аввал мураббийимиз бизнинг барча гаджетларимизни йиғиб олган эдилар, шу сабабдан биз интернетга ҳам кира олмаган эдик. Биз ўйингача ҳеч ким билан телефон орқали ҳам гаплаша олмадик, - дейди Даврон Ҳошимов.
