Хабар берганимиздек, ОФК Кубоги баҳсларида 4-тур учрашувлари бўлиб ўтди.
Ўзбекистон терма жамоасига номзод ярим ҳимоячи Шоҳруҳ Гадоев фаолият олиб бораётган Баҳрайннинг “Муҳаррақ” клуби Суриянинг “Ал-Жаиш” жамоаси уйига сафар уюштирди ва меҳмондан 2:0 ҳисобидаги ғалаба билан қайтди. Диққатга сазовор жиҳати шундаки, Азиз Асимов бошчилигидаги ўзбекистонлик ҳакамлар бригадаси бошқариб борган ўйинда ҳамюртимиз Шоҳруҳ Гадоев ҳам ўз номини таблога ёздириб қўйишга эришди. Биз маҳоратли легионеримизнинг мазкур ўйин борасидаги фикрлари билан қизиқдик.
"Таъкидлашим лозим, ўйин жуда қизиқарли тарзда ўтди. “Ал-Жаиш” жамоаси ҳам ёмон ўйнамади. Рақибга ҳам очко зарур эди. Биз эса аввалдан гуруҳда 1-поғонада келаётгандик ва шу сабабли ортиқча босимсиз ўйнадик. Майдонга фақат ғалабани кўзлаган ҳолда чиққандик. Шукр, буни уддалай олдик.
Мен ўзим ҳам гол киритиб, жамоамнинг ғалабасига хисса қўша олганимдан жуда ҳам шодман. Киритган голимда жамоадошларимнинг ҳам улушлари катта. Биз “Ал-Жаиш”ни жамоавий ўйин кўрсатган ҳолда мағлуб этдик.
Баҳсни ўзбекистонлик ҳакамлар бригадаси бошқариб борди. Улар жуда яхши ишлашди. Бу ўйинда ҳакамлик маъромида бўлди, уларга эътирозлар бўлиши мумкин эмас.
Энди жамоамиз қолган ўйинларда ҳам ғалаба қозонишга ҳаракат қилади. Ўзи аслида бош мақсадимиз – ОФК Кубогида бош совринни қўлга киритишдир. Миллий чемпионатда ҳам олтин медаллар учун кураш олиб бораётган эдик. Аммо Баҳрайн Премьер-лигасида 1-ўринда бораётган “Ал-Ҳидд”ни бироз ўзимиздан ўтказиб юбордик. Шу боисдан эндиликда бор эътиборимиз ОФК Кубоги баҳсларига қаратилди. Насиб этса, “Муҳаррақ” билан ОФК Кубогида зафар қучмоқчиман", - дейди ҳамюртимиз SPORTS.uz интернет-портали мухбирига.
Таъкидлаб ўтамиз, “Муҳаррақ” ОФК Кубогида 4-турдан сўнг ўзи иштирок этаётган “D” гуруҳида 12 очко жамғарган ҳолда кейинги босқич масаласини муддатидан олдин ҳал этиб улгурди.
