22 ёшли ўзбекистонлик Қудратилло Абдуқаҳҳоров (5-0-0, 5 КО) Селангордаги (Малайзия) "One World Hotel" аренасида 22 ёшли мексикалик Хуан "Торнадо" Ороскога (9-2-2, 8 КО) қарши рингга чиқди. Боксчилар бу тўқнашувда "WBF" ва "WPBF Youth" чемпионлик камарлари учун беллашдилар.
10 раундли жангда боксчимиз рақибидан устун келиб, чемпионликни қўлга киритди. Бу унинг профессионал фаолиятидаги олтинчи жанг бўлди ва буларнинг барчасини ғалаба билан якунлаган.
Қудратилло профессионал боксдаги дебют баҳсини 2015 йил 18 октябрида бошлаган ва бу жанггача деярли ярим йил давомида 5 жанг ўтказиб, барчасини нокаут билан якунлади. Абдуқаҳҳоров айни дамда ўзбек боксчилари рейтингида Баҳодир Мамажонов, Бехзод Набиев ва Ўктамжон Раҳмоновдан сўнг тўртинчи поғонада турибди.
WPBF - профессионал боксда катталиги бўйича олтинчи ташкилот ҳисобланади. Мазкур ташкилот рўйхатдан ўтказиш ва профессионал бокс бўйича халқаро турнирлар ташкил қилиш ҳуқуқига эга.
