Олий лига 6-тур доирасидаги “Машъал” – “Нефтчи” (1:2) баҳсидан сўнг беллашувда дубл қайд этган Мурод Бобожонов ўйин ҳақида фикр билдирди.

— Ғалаба ўз ўзидан келмайди. Натижага эришиш учун ўйингача ва баҳс давомида қаттиқ меҳнат қилиш керак бўлади. Ғалаба қозонганимиздан хурсандман. Ўйин борасида нима дейиш мумкин ? Ҳақиқатан ҳам қийин ўйин бўлди. Бу ғалаба бизга жуда керак эди. Худога шукур, Муборакдан уч очко билан қайтяпмиз. Тезкор голдан сўнг майдонда ҳамма бир-бирини қўллаб-қувватлаб олдинга чорлади. Ҳамжиҳатликни ҳисобига ғалаба қозондик.

— Мурод, захирага олинаётган пайтингизда, майдонда бироз тўхтаб қолдингиз ва “Нефтчи” футболчиларига нималардир гапирдингиз?
— Ўша пайт ҳисобда олдинда бораётган эдик. Йигитларга бўшашмасликни айтиб, баҳсни ғалаба билан тугатишларини сўрадим. “Бугун ютишимиз керак” дедим.

— Рақиб ҳақида нима дейсиз?
— “Машъал” яхши ўйнади. Уларда ҳам гол киритиш учун имкониятлар бўлди. Бироқ бугун омад биз тарафда эди.

— Ўйиннинг энг яхши футболчиларидан бири Ўткир Юсупов ҳақида қандай фикрдасиз?
— Бугун Ўткир ўз ишини аъло даражада уддалади. Мазкур ғалабадан сўнг дарвозабонимизни ўзига бўлган ишончи ортди деб ўйлайман ва навбатдаги баҳсларда ҳам мана шундай ўйин кўрсатишини тилаб қоламан.

“Нефтчи” матбуот хизмати.