Бундан бироз вақт олдин “Навбаҳор” клуби раҳбарияти, мураббийлар штаби ва жамоа аъзолари иштирокида йиғилиш бўлиб ўтди. Мазкур йиғилишда “Навбаҳор” жамоасининг 2016 йилги чемпионатнинг дастлабки олти турдаги иштироки муҳокама қилинди. Йиғилишда сўзга чиққан Наманган шаҳар ҳокими, “Навбаҳор” футбол клуби президенти Баҳодир Бекходжаев жамоа учун барча шарт-шароитлар яратиб берилаётган бўлсада натижалар ижобий кўриниш олмаётганлигини айтиб, вазиятни ўнглаш мақсадида чора кўрилиши лозимлигини эътироф этди. 

Клуб президенти жамоада бош мураббий сифатида иш юритган Рашид Ғофуров бугундан эътиборан саломатлиги ва ўз аризасига биноан ўз вазифасидан озод этилганлигини билдириб ўтди. Шунингдек, мураббийлар штабида қисқартиришлар амалга оширилганлиги туфайли мураббийлар Шуҳрат Мирхолдиршоев ва Шерзод Жўраевлар билан тузилган шартномалар ҳам бекор қилинганлиги таъкидланди. Келгусида жамоа бош мураббий вазифасини Александр Волков бажариши маълум қилинди. Ўз навбатида давра якунига кўра жамоа аъзолари олдига 2015 йилги натижадан кам бўлмаган вазифани бажариш қўйилди. Мураббий ва футболчилар зиммаларидаги вазифаларни бажара олишмаса давралар оралиғида ўзаро тузилган шартномаларни кўриб чиқиш ҳақида огоҳлантирилди.