Футбол бўйича ЖЧ—2018 3-саралаш босқичи арафасида турган Ўзбекистон миллий терма жамоаси 2016 йил ҳисобидан Тошкентда биринчи бор ўртоқлик ўйини ўтказиши мумкин.
Норасмий маълумотга кўра, 2 июнь куни терма жамоа Тошкентда ўйин ўтказади. Беллашувнинг ўтиш ёки ўтмаслиги, унда рақиб ким бўлиши ҳақида расмий маълумот йўқ.
Тасдиқланмаган хабарга кўра, Самвел Бабаян жамоаси 2 июндаги эҳтимолий ўйиндан кейингина Австрияга жўнаб кетади ҳамда 7 июнь куни Канадага қарши саф тортади. Осиё Футбол Конфедерацияси тасарруфидаги терма жамоалардан Австралия, Япония, Саудия Арабистони, БАА, Ироқ, Таиланд каби мамлакатлар 2 июнь куни ёки шу кун арафасида ўртоқлик ўйинида майдонга тушади.
Жанубий Корея, Эрон, Хитой, Қатар, Сурия каби терма жамоалар эса ЖЧ—2018 3-саралаш босқичида Ўзбекистон билан бир гуруҳдан жой олган.
2 июнь куни Европа қитъасининг кўзга кўринган терма жамоалари Евро—2016 турнири олдидан ўртоқлик ўйинларини келишиб қўйган. Африка мамлакатлари эса қитъа чемпионатининг саралаш ўйинларида майдонга тушади.
Шундан келиб чиқиб, Ўзбекистон терма жамоаси Тошкентдаги ўртоқлик ўйинига муносиб рақиб топа олмаслиги ҳам мумкин.
Маълумот учун, Ўзбекистон миллий терма жамоаси 2007 йилдан буён 12 та ўртоқлик уй ўйинида иштирок этган. 2010, 2011, 2013 йиллари Ўзбекистон миллий терма жамоаси ўз майдонида ўртоқлик учрашуви ўтказмаган.
