Хабарингиз бор, Ўзбекистон миллий терма жамоасига номзод футболчилардан бири саналадиган Ҳусниддин Ғофуров айни пайтда Сербия Суперлигаси иштирокчиси “Явор” жамоаси шарафини ҳимоя қилмоқда.

Серб Суперлигасида 33-тур учрашувлари ўтказилди. Элитадаги ўрнини сақлаб қолиш учун уринаётган “Явор Матис” бу турда Белграднинг “ОФК” клубига қарши баҳс юритди. Жуда қизиқарли тарзда кечган матчда “Явор” кичик ҳисобда зафар қучди ва қимматли 3 очкога эга бўлди.

Диққатга сазовор жиҳати шундаки, ўйин тақдирини ҳал этган ягона голни ҳамюртимиз Ҳусниддин Ғофуров ўз ҳисобига ёздириб қўйди.

Ўйиннинг 77-дақиқасида фарғоналик ёш ҳужумкор ярим ҳимоячи қанотдан туриб рақиб посбонининг ожиз жойини топа билди ва жуда чиройли гол муаллифига айланди.

Ҳусниддин Ғофуровнинг айтишича, у мазкур голни “Нефтчи” жамоаси муваффақиятлари учун тер тўкаётган таниқли мутахассис Шерзод Раимжоновнинг таваллуд кунига бағишлайди.

Шу тариқа, мазкур ғалабадан сўнг “Явор” ўз ҳисобидаги очколар сонини 21 тага етказиб олди. Жамоа навбатдаги ўйинини 3 май куни “Нови Пазар”га қарши ўтказади.