«Вольфсбург» клуби бош мураббийи Дитер Хеккинг жамоасининг омадсизлиги ҳақида сўзлаб берди. Чемпионат якунланишига икки тур қолганида “бўрилар” 39 очко билан турнир жадвалининг 10-поғонасини банд этиб туришибди.
Ўтган мавсумда “Волфьсбург” “Бавария”дан кейин 2-ўринни қўлга киритган эди. Хеккинг жамоанинг салбий натижаларини Кевина де Брёйне «Манчестер Сити»га ўтиб кетгани билан боғлади.
«Мен доим Де Брёйне ва Перишич ҳақидаги саволларга жавоб бермасликка ҳаракат қилдим. Бироқ, қачонки жамоа ўйинига назар солганингда, биз қандай икки тажрибали футболчиларни қўлдан бой берганимизни кўрасан. Де Брёйне бир неча ҳафта жароҳат олган пайтида «Манчестер Сити» атиги икки ўйинда ғалаба қозонди холос. Бундай футболчини алмаштириш мумкинмас», — деди Хеккинг Sport Bildга берган интервьюсида.
