Ўзбекистоннинг амалдаги чемпиони – Тошкентнинг «Пахтакор» футбол клуби бош мураббийи Нўъмон Ҳасановнинг онаси оламдан ўтди. Бу ҳақда клуб матбуот хизмати хабар бермоқда.

«Жамоамиз бош мураббийи Нўъмон Ҳасановнинг онаси вафот этгани сабабли ‘Пахтакор’ футбол клуби мураббий ва унинг яқинларига таъзия билдиради», – дейилади клуб матбуот хизматининг 9 май, душанба куни чоп этилган хабарида.

Нўъмон Ҳасанов онасининг саломатлигидаги муаммолар туфайли «Ал-Жазира»га қарши (3:1) 19 апрель куни ўтказилган Осиё Чемпионлар Лигаси 5-турида иштирок этиш учун Абу Дабига бора олмаганди.

Шунингдек, «Пахтакор» устози 2 май куни «Ал-Жазира»га қарши ОЧЛ 6-тури олдидан ўтказилган матбуот анжуманида иштирок этган. 3 май куни «Пахтакор»нинг 3:0 ҳисобидаги ғалабаси билан якунланган ўйиндан кейинги матбуот анжуманида эса «Пахтакор» мураббийи Григорий Колосовский қатнашган.

Бундан ташқари, Нўъмон Ҳасанов «Навбаҳор»га қарши (3:0) Олий Лига 8-турида захира ўриндиғида кўринмаган эди. Учрашувдан кейин бўлиб ўтган матбуот анжуманида жамоа мураббийи Григорий Колосовский иштирок этган.