Ўзбекистон миллий терма жамоасининг ЖЧ-20183-саралаш босқичидаги рақиби – Хитой миллий терма жамоаси июнь ойида иккита ўртоқлик учрашуви ўтказиш борасида келишувга эришди.

Хитой Футбол Уюшмаси хабарига кўра, Гао Хунбо бош мураббийлигидаги Хитой терма жамоаси дастлаб, 3 июнь куни Тринидад ва Тобаго терма жамоасига қарши ўртоқлик учрашувини ўтказса, 7 июнь куни Қозоғистон миллий терма жамоасига қарши ўйнайди. Ҳар иккала учрашувга ҳам Хитой мезбонлик қилиши тасдиқланди.

Эслатиб ўтамиз, Хитой миллий терма жамоаси ЖЧ-2018 3-саралаш босқичи "A" гуруҳида Ўзбекистон терма жамоасига рақиблик қилади. Мазкур гуруҳ баҳслари доирасида Ўзбекистон ҳамда Хитой терма жамоалари ўртасидаги илк ўйинга шу йилнинг 11 октябрь куни Тошкентда ўтказилади. Терма жамоаларнинг гуруҳ босқичидаги иккинчи ўйинига эса, 2017 йилнинг 31 август куни Хитой мезбонлик қилади.

Аввалроқ хабар берилганидек, Самвел Бабаян бош мураббийлигидаги Ўзбекистон терма жамоаси ҳам июнь ойида бир қатор ўртоқлик учрашувларида майдонга тушиши режалаштирилган. Улардан бири 8 июнь куни Австриядаги йиғин давомида Канада терма жамоасига қарши бўлиб ўтади.