Португалиялик футбол мураббийи Жозе Моуриньо Англиянинг «Манчестер Юнайтед» жамоаси билан шартномани 27 май, жума куни имзолайди. Бу ҳақда Sky Sports’га таяниб, «ТАСС» хабар бермоқда.
23 май, душанба куни «Манчестер Юнайтед» раҳбарияти голландиялик Луи ван Гални жамоа бош мураббийлигидан озод этганди.
Жозе Моуриньонинг манкунианлар бош мураббийи этиб тайинланиши имиж ва реклама борасидаги зиддиятлар туфайли кечиктирилмоқда.
Норасмий маълумотларга кўра, томонлар уч йилга мўлжалланган шартнома борасида келишиб олган, аммо реклама ва баъзи тижорат масалалари бўйича музокаралар давом этмоқда. Улар якунига етгач, Моуриньонинг «МЮ» бош мураббийи этиб тайинланиши расман эълон қилинади.
Аввалроқ 53 ёшли португалиялик мураббийнинг агенти Жорже Мендеш 24 май, сешанба куни «МЮ» раҳбарияти билан музокаралар ўтказиш учун Лондонга ташриф буюргани маълум бўлганди. Жамоа Жозе Моуриньо бошқа клубларнинг таклифини қабул қилмаслиги учун унга 4 миллион фунт стерлингни олдиндан тўлагани таъкидланмоқда.
Эслатиб ўтамиз, португалиялик мутахассиснинг сўнгги иш жойи Лондоннинг «Челси» клуби бўлган. Моуриньо жамоада қайд этган қониқарсиз натижалари учун 2015 йилнинг декабрь ойида «Челси» бош мураббийлигидан истеъфога чиқарилган эди.
