Халқаро олимпия қўмитаси қочқинлар терма жамоаси таркибига киритилган спортчилар номини эълон қилди. Улар Рио-де-Жанейро - 2016 Олимпия ўйинларида иштирок этишади.
БМТ янгиликлар маркази хабарига кўра, жамоага икки нафар суриялик сузувчи, Конго демократик Республикасидан икки дзюдочи, ҳамда Эфиопия ва Жанубий Суданлик 6 нафар енгил атлетикачи кирган. Уларнинг барчаси зўравонликлар ҳамда таъқиблардан қочиб, ўз ватанини тарк этишга мажбур бўлишган. Бу спортчилар Бельгия, Германия, Люксембург, Кения ва Бразилияда бошпана топишган.
Айтиш жоизки, қочқинлар жамоаси Олимпия ўйинларида илк маротаба иштирок этади. Жамоа аъзолари, 5 август кунги очилиш маросимида мезбон жамоа Бразилия термасидан сўнг, Олимпия байроғи остида майдонга чиқади.
