Бугун Тулуза шаҳрида Уэльс ва Россия терма жамоалари ўртасида бўлиб ўтадиган ўйинга қўшимча 600 нафар полиция ходими жалб этилди. Бу ҳақда "Индепендент" нашри хабар берди.

Тўғри, миллионлар ўйинини севган ҳар бир мухлис ҳар бир ўйинга ўзгача иштиёқ ва ҳиссиёт билан қарайди. Лекин бу ўйин давомида рақиб мухлисларига тажовуз ўтказиш ёки уларни ҳақоратлаш дегани эмас. Россия бу нуфузли турнирда ўтказган ўзининг биринчи ва иккинчи ўйинларида бироз “жонбозлик” кўрсатиши оқибатида УЕФА Федерацияси томонидан жамоа шартли равишда дисквалификация қилинди.

Уч нафар россиялик мухлис ҳаракатлари учун ҳибсга олинган. Шунга қарамай, Россия футбол ишқибозлари қўмитаси рақиб мухлислари россиялик ишқибозларнинг ушбу можароларни келтириб чиқаришига сабаб бўлди, деб маълумот берган.

Бироқ, ўйин қандай натижа билан тугашидан қатъи назар, бу футбол, жанг майдони эмаслигини ҳеч ким ёддан чиқармаслиги лозим.