Испания терма жамоаси гуруҳ босқичнинг сўнгги ўйинида Хорватияга 1:2 ҳисобида ютқазди ва гуруҳда 2-ўринни эгаллади.

Ўйиннинг 7-дақиқасида ҳисоб очилди. Чиройли комбинация якунида Фабрегас жарима майдонига ёриб кириб, тўпни Моратага оширди. Альваро эса бўш қолган дарвозани яқин масофадан аниқ ишғол этди.

Бўлим якунида Хорватия ҳисобни тенглаштирди. Чап қанотдан Ракитич тўпни жарима майдонига етказганида, Калинич яқин масофадан зарба йўллаб, дарвозани ишғол этди.

72-дақиқада бош ҳакам Хорватия дарвозаси томон пенальти белгилади. Бироқ Серхио Рамос уни аниқ амалга ошира олмади. Марказдан йўлланган зарбани Субашич қайтара олди.

Ўйин якунида эса Хорватия ғалабани илиб кетди. Тезкор қарши ҳужумда Перишич чап қанотдан жарима майдонига ёриб кирди ва кучли зарба йўллаб, дарвозанинг пастки яқин бурчагини аниқ нишонга олди.

Бу ғалаба Хорватияни биринчи ўринга чиқариб, Испанияни иккинчи ўринга тушириб юборди. Натижада, нимчоракфинал баҳсида Испания – Италия баҳсини кўрадиган бўлдик. Хорватиянинг рақиби эса эртага бўлиб ўтадиган ўйинлардан сўнг аниқланади.

21 июнь, Бордо, «Стад де Бордо»

Хорватия – Испания 2:1 (1:1)

Голлар: Калинич (45), Перишич (87) – Мората (7)

Амалга оширилмаган пенальти: Рамос (72)

Хорватия – Субашич, Срна, Чорлука, Едвай, Врсалько, Рог (Ковачич, 82), Бадель, Перишич (Крамарич, 90), Ракитич, Пьяца (Чоп, 90), Калинич.

Испания – Де Хеа, Хуанфран, Пике, Рамос, Альба, Фабрегас (Алькантара, 84), Бускетс, Иньеста, Сильва, Мората (Адурис, 67), Нолито (Сориано, 60).

Огоҳлантиришлар: Рог (29), Врсалько (70), Срна (70), Перишич (88).