«Реал Мадрид» раҳбарияти аста-секин ўз режаларини амалга оширмоқда. Дейлик, яқинда «Ювентус»дан Альваро Мората қайта сотиб олинди ва энди Поль Погба «нишон»да турибди. Бу борадаги гап-сўзлар тобора авж олаётганига қарамай, «кекса синьора»нинг асосий умидларидан бири Пауло Дибала мутлақо хотиржам. Ҳарқалай, аргентиналик иқтидор франциялик ярим ҳимоячининг Туринда қолишига шубҳаланмаяпти ва у билан ҳали узоқ вақт ҳамкорликда тўп суришдан умидвор.
- Испанлар сизга Лионель Мессининг бўлажак вориси сифатида қарашяпти...
- «Ювентус» сафига қўшилганимга бир йил бўлди ва бу муддатда кетиш ҳақида ўйлаганим ҳам йўқ. Мана, мавсум омадли кечиб, биз скудеттодан ташқари, Италия кубоги ва суперкубогини ютдик. Энг асосийси, туринлик мухлислар мени яхши кўришади ва ўзим ҳам барчасидан мамнунман. Шундай экан, айни пайт Испания чемпионати ёки бошқаси ҳақида ўйлашимдан маъно йўқ.
- Шон-шуҳрат ва машҳурлик йўлида нималарнидир қурбон қилиш талаб этилади. Мисол учун, сиз жонажон уйингиздан жуда эрта чиқиб кетгансиз.
- Ҳа, шундай. Мен кичиккина шаҳарчада туғилганман ва у ерда машҳурликка эришиш қийин эди. Хуллас, футболчи сифатида ўсиш учун оиладан кетишимга тўғри келган. Хайриятки, «Палермо»да барчаси кўнгилдагидек ривожланди ва энди «Юве»да шундай давом этяпти. Оддий айтганда, жамоа менга орзуларни рўёбга чиқаришда ёрдам беряпти. Ўз ўрнида алоҳида таъкидлашим керак, Жузеппе Якини раҳбарлигида «B» серияси ўйинлари орқали анча улғайдим.
- «Ювентус» қаторасига 5-марта скудетто соҳибига айланди ва энди кўринишидан, Чемпионлар Лигасида зафар қучишни кўзламоқда. Сизнингча, бу вазифа «бьянконерлар» учун реал мақсадми ёки...?
- Фақат бир гапни ишонч билан айта оламан: «Ювентус» худди Мадриднинг «Реал», Мюнхеннинг «Бавария» ва «Барселона» каби жамоалардек буюк клубдир. 2 мавсум олдин турнир финалида ўйнаган эдик, ўтган сафар эса «Бавария» атиги 30 дақиқа оралиғида жамоамизни курашдан чиқариб юборди. Яъни бизга озгина омад етишмади.
- Дани Алвеш «Барселона» билан хайрлашиб, «Юве» сафини тўлдирди. Энди унинг узатмалари ҳисобига кўпроқ гол уришни мўлжаллаётгандирсиз...
- Алвешни амалда кўп марта кўрганман. Барса»да Месси билан қанотда қандай ўйнагани ҳаммага маълум. Қисқаси, гап ҳам ҳимоя, ҳам ҳужумда бирдек наф келтирадиган техник салоҳияти ўта баланд футболчи ҳақида кетяпти. Табиийки, унинг тўп оширишларидан унумли фойдаланишни хоҳлайман.
- Шунингдек, Миралем Пьянич ҳам жамоангиз сафига қўшилди. Шундай машҳур футболчилар «Юве»нинг ЧЛда ғалаба қозонишига талаб даражасида ёрдам бера олишармикан?
- Бу мен учун кутилмаган трансфер бўлди. Тўғрироғи, бир неча кун ОАВга назар ташламадим, қўлимга газета олганимда эса, жамоа Пьянич билан шартнома тузиб бўлган экан. Лекин нимадандир ҳайрон қолганим йўқ: кўплаб футболчилар «Ювентус» либосини кийишни хоҳлашади, ахир.
- Таътил бошлангани-дан буён Мас-симилиано Аллегри билан бирор марта гаплашдингизми?
- Йўқ, лекин яқин кунларда яна кўришамиз.
- Поль Погбанинг терма жамоадаги ишлари унча силлиқ кечаётгани йўқ. Ҳойнахоҳ, бундан роса сиқилаётгандир...
- Полни жуда яхши биламан: у хотиржам йигит. Дейлик, «Ювентус»даги ўйинлари туфайли жиддий танқидларга учраганида ҳам, ўзини йўқотиб қўймади. Аксинча, маълум вақтдан кейин барчасини футбол майдонида исботлади. Демоқчиманки, босимни енгиб ўтиш унинг учун муаммо эмас. Бинобарин, футболчи борки, у ўзини кўрсатадиган ўйинни сабр билан кутиши лозим. Зеро, ҳаммасининг ўз вақт-соати бор. Бироқ Погбага ўхшаш йигитларнинг ўйинлари қовушмаса, бу ҳолат ғалати туюлади, албатта.
- Погба ёзда бошқа жамоага ўтиб кетиши мумкин. Воқеаларнинг бундай ривожидан чўчимайсизми?
- Йўқ, Поль шу ерда қолади. У билан бу масалада гаплашиб кўрдим ва ўйлайманки, яқин орада ҳеч қаерга кетмайди.
- Дани Алвеш ортидан Хавьер Маскерано ҳам «Юве» билан шартнома тузса, нима бўларкин?
- Мен Маскерано билан бирга ўйнашга улгурганман - терма жамоада. Умуман, энг яхши ижрочилар билан битта жамоада ўйнаш кимга ҳам ёқмасди?
- Альваро Моратанинг кетгани «Ювентус» учун нечоғли муаммо?
- Бу катта йўқотиш, албатта. Хусусан, унинг охирги муваффақиятлари ва жамоага нисбатан муносабатини назарга олсак, шундай. Альваро ажойиб йигит ва яхши дўст. Дейлик, менинг Туринга мослашиб олишимга кўп ёрдам берганди...
Манба: Football.ua, А. АҲМЕДОВ тайёрлади
