Жиззахда ўтказилган “Отам, онам ва мен – спортчи оила” мусобақасида 13 оилавий жамоа иштирок этди. 

“Маҳалла” хайрия жамоат фонди вилоят бўлими ва бошқа ташкилотлар ҳамкорлигида ташкил этилган тадбирда Президентимиз раҳнамолигида оила институтини янада мустаҳкамлаш, соғлом турмуш тарзини қарор топтириш, оилалар ўртасида спортни оммалаштиришга алоҳида эътибор қаратилаётгани таъкидланди. Бу йилги мусобақанинг қуйи босқичларида 600 дан зиёд оилавий жамоа ўзаро баҳслашди.

Тўсиқлар оша югуриш, мерганлик, арқон тортиш каби шартлар бўйича беллашувларда биринчи ўрин мусобақанинг ўтган йилги ғолиб жамоаси – Пахтакор туманидан Соатовлар оиласига насиб этди. Иккинчи ва учинчи ўринларни Зомин туманидан Ҳазратқуловлар, Мирзачўл туманидан Бобоевлар оилалари эгаллади.

– Мамлакатимизда спортни ривожлантириш, айниқса, оилаларда соғлом турмуш тарзини қарор топтириш борасида амалга оширилаётган ишлар туфайли ушбу мусобақанинг нуфузи йилдан-йилга ошмоқда, – дейди ғолиб Рустам Соатов. – Бу йил ҳам ушбу мусобақага пухта тайёргарлик билан келдик. Турмуш ўртоғим Гулмирахон, ўғлим Достонбек, қизим Севинч оилавий жамоамиз муваффақияти учун астойдил ҳаракат қилди.

Ғолиб ва совриндор спортчи оилалар муносиб тақдирланди.