«Насаф» жамоасининг асосий таркибидан яна уч нафар футболчи Равшан Ҳайдаров бошчилигидаги Ўзбекистон U-23 терма жамоасига таклиф олди.

Бунгача асосий таркиб ўйинчиларимиздан Бобур Абдуҳолиқов, Шароф Муҳитдинов, Азизжон Ғаниев ва Умид Эргашевлар Жасур Абдурайимов бошчилигидаги Ўзбекистон U-19 терма жамоамиз сафига жалб этилган эди. Ушбу футболчиларимиз ҳозирги кунда терма жамоа билан Сингапурда бўлиб туришибди.

Футболчиларимиздан яна Элдорбек Суюнов, Дониёржон Нарзуллаев ва Нажмиддин Нормуродовлар Ўзбекистон U-23 терма жамоамиз сафига таклиф қилинган.

Хабарингиз бор, 21 июл куни Ўзбекистон U-23 терма жамоамиз Тошкентда Ироқ терма жамоаси билан ўртоқлик учрашуви ўтказади. Шу муносабат билан юқорида номлари тилга олинган футболчиларимиз терма жамоа ихтиёрига жўнаб кетишган.

Шундай қилиб, айни пайтда “Насаф” жамоасининг етти нафар футболчиси терма жамоалар сафида бўлиб туришибди. Ушбу футболчиларимиз 25 июл куни клубимиз ихтиёрига қайтиб келишади.