Тошкент вилоятида кураш бўйича “Маҳалламиз паҳлавонлари” мусобақаси ўтказилди.

“Маҳалла” хайрия жамоат фонди вилоят бўлими, вилоят маданият ва спорт ишлари, халқ таълими, соғлиқни сақлаш бошқармалари ҳамда бошқа ташкилотлар ҳамкорлигида ташкил этилган мусобақанинг қуйи босқичларида ғолиб бўлган 13-14 ёшли 108 ўғил-қиз ўз вазн тоифасида гиламга тушди.

Ватанимиз мустақиллигининг 25 йиллигига бағишлаб “Соғлом она ва бола йили” Давлат дастури ижроси доирасида ташкил этилган тадбирда Президентимиз раҳнамолигида ёш авлоднинг жисмонан соғлом, маънан етук инсонлар бўлиб улғайиши, спорт билан мунтазам шуғулланиши, истеъдод ва салоҳиятини юзага чиқариши учун яратиб берилаётган шароитлар юксак самаралар бераётгани таъкидланди.

Ўғил болалар ўртасида 50, 52 ва 55 килограмм вазн тоифасида зангиоталик Абдураим Лутфуллаев, Юқори Чирчиқ туманидан Ҳаётбек Абдуллаев, Оҳангарон туманидан Файзулла Орифжонов биринчи ўринни эгаллади. Қизлар ўртасида 44 ва 46 килограмм вазн тоифасида Пискент туманидан Ёдгора Салоҳиддинова, Наргиза Чиндавлатова, 48 килограмм вазнда Ангрен шаҳридан Гулҳаё Сафарбоева ғолибликни қўлга киритди.

Ғолиб ва совриндорлар ташкилотчилар томонидан муносиб рағбатлантирилди.