Хабарингиз бўлса керак, «Барселона» «Валенсия»нинг португалиялик ярим ҳимоячиси Андре Гомесни расман ўз таркибига қўшиб олди. 22 ёшли футболчи «Барселона» клуби тарихидаги 7-португалиялик футболчига айланди. Унгача «Барселона» сафида Луиш Фигу, Виктор Баия, Фернандо Куто, Симао Саброза, Рикардо Куарежма ва Декулар каталонияликлар шарафини ҳимоя қилишган. Яна бир Хорхе Алберто Мендонка исмли футболчи ҳам 1967 - 1969 йиллар оралиғида «Барселона» учун ўйнаган. Қуйида «Барселона» сафида ўйнаган футболчилар ҳақида қисқача тўхталиб ўтамиз:
Луиш Фигу: 1995 - 2000 йиллар оралиғида Каталония клуби шарафини ҳимоя қилган футболчи 249 ўйинда майдонга тушиб, 45 гол уришга муваффақ бўлган ва 6 совринга эга чиққан. Лекин Фигу «Барселона» клуби сардори бўлишига қарамай Мадриднинг «Реал» клубига ўтиб кетган.
Витор Баия: бу футболчи «Барселона» таркибида 1996 - 1999 йилларда ҳаракат қилган ва 55 учрашувда майдонга тушган. Бу вақт оралиғида каталонияликлар 6та совринни қўлга киритган Виктор 1999|2000 йилларда мавсумда «Порту»га қайтди. «Барселона» бу футболчини айнан «Порту»дан харид қилган эди.
Фернандо Куто: ўйнаган йиллари 1996 - 1998. «Барселона» либосида 63та учрашув ўтказган ҳимоячи расмий учрашувларда ўз ҳисобига 2та гол ёздириб қўйган ва 6та совринга эга чиққан. Каталонияликлар сафига «Парма»дан келиб қўшилган футболчи 1998 йили Италиянинг «Лацио» жамоасига ўтди. У ерда олти йилни ўтказиб яна «Парма»га қайтган.
Симао Саброза: 1999 - 2001 йилларда «Барселона»да ҳаракат қилган Саброза 71 учрашувда майдонга тушган ва ўз ҳисобига 4та гол ёздириб қўйган. Испанияда уч йил ичида Симао каталонияликлар билан 1 соврин ютди. Шундан сўнг, Португалияга қайтган футболчи олдин «Спортинг», кейинчалик «Бенфика» жамоаларида ўйнади.
Рикардо Куарежма: «Барселона» сафида бир мавсум (2003|2004) ҳаракат қилган футболчи 30 учрашувда майдонга тушган ва 2та гол урган. Куарежма ўйнаган мавсумда «Барселона» соврин юта олмаган (примерода 2-ўрин, ЕЧЛда 1|8 финал). Шундан сўнг, португалиялик футболчи «Спортинг» клубига кўчиб ўтди.
Деку: Деку «Барселона» билан энг кўп соврин ютган португалиялик футболчи саналади. 2004-2008 йиллар оралиғида каталонияликлар сафида 164 ўйин ўтказган футболчи ўз ҳисобига 23та гол ёздириб қўйган ва жамоа билан 7та совринни қўлга киритган. «Барселона»да ажойиб даврларни бошидан ўтказган Деку 2008 йили Англияга йўл олди ва «Челси» аъзосига айланди.
Кўрамиз Андре Гомешнинг «Барселона»даги юриши қандай кечаркин.
