Ҳимоячи Бранислав Ивановичнинг «Челси»ни тарк этиши учун ҳеч қандай асос йўқ. Бу ҳақда футболчининг агенти Зоран Крнетта маълум қилди.
Аввалроқ 32 ёшли сербиялик футболчига Москванинг «Спартак» клуби қизиқиш билдираётгани ҳақида хабарлар пайдо бўлган эди.
«Иванович ҳозирда «Челси» билан бирга АҚШда. Албатта, футболда ҳеч ким ҳеч нарсадан кафолатланмаган ва матбуотда унинг бошқа жамоага ўтиши ҳақида мунтазам равишда хабарлар чиқиб туради», — деди Крнетта.
«Бироқ у «Челси»да ўзини бахтиёр ҳис қилмоқда ва яқинда клуб билан янги шартнома имзолади. Шундай экан, фаолиятининг ҳозирги босқичида унинг бошқа бир жамоага ўтиши учун ҳеч қандай асос йўқ», — дея қўшимча қилди агент.
