«Вест Хэм» ҳужумчиси Диафра Сахо жамоадан кетишга яқин турибди. Sky Sports хабарига кўра, клуб раҳбарияти 26 ёшли футболчининг трансфери масаласида «Вест Бромвич» билан келишиб олган.
Манба маълумотларига кўра, трансфер суммаси тахминан 16 миллион фунт (19 миллион еврога яқин) бўлади.
Хабар беришларича, Диафра Сахонинг янги жамоага ўтгани ҳақида расман яқин кунларда ахборот берилади.
Сахо июль ойида ўзини трансферга қўйишларини сўраган эди. Норасмий маълумотларга кўра, футболчи апрель ойидаёқ, уни учрашувлардан бирининг асосий таркибига қўйишмагани учун, клуб билан келишмовчиликка борган.
Англия Премьер-лигасининг якунига етган мавсумида Сахо 21 учрашувда майдонга тушиб, бешта гол уриб, учта сариқ карточка олган.
