Пойтахтимизда ўтказилаётган теннис бўйича ўсмирлар ўртасидаги "NBU Cup – 2016" халқаро турнирида спортчиларимиз муваффақиятли қатнашмоқда.

Мамлакатимиз Теннис федерацияси ва Халқаро теннис федерацияси (ITF) томонидан ташкил этилган мазкур мусобақада ўндан ортиқ давлатдан юздан зиёд ёш спортчи ғолиблик учун баҳс олиб бормоқда.

Турнирнинг ўғил болалар ўртасидаги яккалик баҳсларида мамлакатимиз шарафини ҳимоя қилаётган Шаробиддин Абзалов қозоғистонлик Родион Пакни 6:3, 6:7, 6:0 ҳисобида мағлубиятга учратган бўлса, Искандар Каримов қирғизистонлик Намазбек Диушембиевга бирорта ҳам геймни бой бермади (6:0, 6:0). Энди иккинчи даврада Шаробиддин Абзалов ҳиндистонлик Сиддхант Бантия билан, Искандар Каримов кипрлик Менелаос Эфстафиу билан куч синашади.

Жуфтлик баҳсларининг дастлабки даврасида теннисчиларимиздан Амал Султонбеков ва Азизхон Турғунов, Олимжон Набиев ва россиялик Данил Савелев, Бекзод Расаматов ва қозоғистонлик Павел Петров ғалаба қозониб, чорак финал йўлланмасини қўлга киритди.

Мусобақанинг қизлар ўртасидаги яккалик баҳсларида иштирок этаётган Камола Умарова яна бир теннисчимиз Зарнигор Достоновани 6:0, 6:1 ҳисобида мағлубиятга учратди. Шунингдек, теннисчиларимиздан Элина Шарипова ва Лайло Баҳодирова ҳам рақиблари устидан зафар қучиб, иккинчи даврага йўл олди.

Энди Камола, Лайло ва Элина россиялик спортчи қизлар Шаҳзода Асимова, Валерия Деминова ва Таисия Пачкалева билан чорак финал йўлланмаси учун ўзаро рақобатлашади.